21 जनवरी को विष्णु कैबिनेट की बैठक में हुए महत्वपूर्ण फैसले, सीएम हाउस में आयोजित थी कैबिनेट की अहम बैठक, आबकारी विभाग को बनाया गया पावरफुल
21 जनवरी को विष्णु कैबिनेट की बैठक में हुए महत्वपूर्ण फैसले
शक्ति छत्तीसगढ़ से कन्हैया गोयल की खबर
सक्ती- मुख्यमंत्री श्री विष्णु देव साय के अध्यक्षता में आज 21 जनवरी को सिविल लाईन स्थित मुख्यमंत्री निवास कार्यालय म आयोजित कैबिनेट के बैठक म कई ठन महत्वपूरन फइसला लेहे गे हे –
01- मंत्रिपरिषद ह छत्तीसगढ़ आबकारी नीति वित्तीय वर्ष 2026-27 के प्रस्ताव ल मंजूरी दे देहे गए हे अउ एखर ले संबंधित सबो काम-काज बर विभाग ल अधिकृत करे गे हे।
02- मंत्रिपरिषद ह नवा रायपुर अटल नगर म उच्च कोटि के शैक्षणिक संस्थान स्थापित करे खातिर ‘श्री विले पारले कलावनी मंडल’ (SVKM) ल ओखर ‘नरसी मोंजी प्रबंधन अध्ययन संस्थान’ के स्थापना बर सेक्टर-18 म चिन्हारी को गए लगभग 40 एकड़ जमीन ल लीज के रूप म एकमुश्त 90 साल बर देहे के स्वीकृति प्रदान करे गए हे।एसव्हीकेएम (SVKM) एक नामी संस्था हरे, जेन ह साल 1934 ले शिक्षा के क्षेत्र म काम करत हे अउ अभी ओखर 30 ठन शैक्षणिक संस्थान चलत हे, जिहां एक लाख ले जादा लइका मन ल प्री-प्राइमरी ले लेके डॉक्टोरल कार्यक्रम तक शिक्षा मिलत हे। साल 2025 म एनआईआरएफ (NIRF) यूनिवर्सिटी रैकिंग म ए संस्था ल 52वां रैंक मिले रिहिस। नवा रायपुर म ए राष्ट्रीय स्तर के संस्थान के स्थापना ले राज्य म आधुनिक अउ गुणवत्तापूर्ण शिक्षा ल अउ मजबूती मिलही।
03- मंत्रिपरिषद ह नवा रायपुर अटल नगर म 04 नवा उद्यमिता केन्द्र (Entrepreneurship Centers) के स्थापना बर सॉफ्टवेयर टेक्नोलॉजी पार्क्स ऑफ इंडिया (STPI) के संग एमओयू करे के फइसला लेहे हे। एखर ले राज्य म आईटी/आईटीईएस (IT/ITES) उद्योग अउ तकनीकी स्टार्ट-अप इको सिस्टम ल प्रोत्साहित करे म ए एमओयू महत्वपूरन होही।सॉफ्टवेयर टेक्नोलॉजी पार्क्स ऑफ इंडिया (STPI) के 68 केन्द्र संचालित हे, जेमे ले 60 ठन भारत के टियर-2 अउ टियर-3 शहर मन म हे। सॉफ्टवेयर टेक्नोलॉजी पार्क्स ऑफ इंडिया ह छत्तीसगढ़ सरकार के इलेक्ट्रॉनिक्स अउ सूचना प्रौद्योगिकी विभाग के सहयोग ले एआई (AI), मेडटेक (हर्बल दवाई अउ वन उत्पाद वाला), स्मार्ट सिटी अउ स्मार्ट एग्री उद्यमिता केन्द्र मन के माध्यम ले अवइया तीन ले पांच साल म डोमेन विशेष के 133 स्टार्ट-अप्स ल बढ़ावा दीही। राज्य सरकार कोति ले छात्र, उद्यमी, शोधकर्ता अउ उद्योग मन ल ईएसडीएम (ESDM) उत्पाद के प्रोटोटाइप विकसित करे म सहयोग दे बर एसटीपीआई के माध्यम ले एक इलेक्ट्रॉनिक्स सिस्टम डिजाइन अउ विकास (ईएसडीडी) केन्द्र स्थापित करे जाही, जेन ह हर साल 30 ले 40 हार्डवेयर, स्टार्टअप अउ एमएसएमई (MSME) ल सबो किसम के सहायता दीही।
04- मंत्रिपरिषद ह छत्तीसगढ़ राज्य के सबो शासकीय स्वास्थ्य संस्था मन म बढ़िया जांच सुविधा के उपलब्धता पक्का करे बर, अभी के संसाधन ल मजबूत करे बर अउ तय मानक के हिसाब ले जांच के संख्या बढ़ाए बर राज्य के जिला अस्पताल, सामुदायिक स्वास्थ्य केन्द्र अउ प्राथमिक स्वास्थ्य केन्द्र मन म लैब के सही संचालन बर जरूरी फइसला लेहे हे।
